Для вясновай фотаздымкі Таццяна Кескевіч звязала такі эфектны але просты шалік пруткамі з тонкай воўны. Яго асаблівасць і ў спосабе вязання, і ў спалучэнні розных адценняў зялёнага.
Апісанне вязання шаліка пруткамі – чытайце ніжэй.
Фотаздымкі: Аляксандра Баярына
Вам спатрэбіцца: ніткі для вязання 415 м/50г – 4 маткі розных адценняў зялёнага, два з якіх будуць аднолькавага колеру; пруткі №3.
Вязаць трэба ў 2 ніткі.
- Набіраем 67 вочак.
- Першы рад правязваем, чаргуючы адваротныя вочкі з вонкавымі (пачынаем з адваротнага).
- Другі рад правязваем, чаргуючы вонкавыя вочкі з адваротнымі (пачынаем з вонкавага). Гэта неабходна для таго, каб край шаліка не закручваўся.
- Трэці рад і наступныя: вяжам панчошным вязаннем.
Чаргуем пад час вязання колеры наступным чынам:
Клубок першага колеру і два клубкі другога колеру дзелім на тры часткі, клубок трэцяга колеру – на дзве часткі:
- Першая частка шаліка: вяжам у дзве ніткі першы колер.
- Другая частка шаліка: вяжам, выкарыстоўваючы адну нітку першага колеру і адну нітку другога колеру.
- Трэцяя частка шаліка: вяжам у дзве ніткі другі колер.
- Чацвёртая частка: вяжам у дзве ніткі трэці колер.
Скончваем вязанне шаліка такім жа чынам, як і пачыналі, чаргуючы вонкавыя вочкі з адваротнымі. У канцы закрываем кожныя 16 вочак, 17-ае прапускаем, замест яго робім паветранае вочка. Так паўтараем 3 разы і закрываем астатнія 16 вочак. Пасля гэтага шалік мыем у халаднаватай вадзе, высушваем у гарызантальным становішчы. І толькі пасля гэтага кожнае 17-ае незакрытае вочка распускаем (як “стрэлкі” у панчохах) на ўсю даўжыню шаліка. Такім чынам, усяго трэба распусціць 3 вочкі.
Парада
Калі не знойдзеце пражу патрэбных адценняў зялёнага ў крамах, можаце купіць 4 скруткі аднолькавага светла-зялёнага колеру і з дапамогай фарбавальнікаў або фарбы па тканіне афарбаваць ніткі самастойна ў жаданыя колеры.